నగదు కాజేశాడని తనయుడిపై నింద..మనస్తాపంతో తండ్రి ఆత్మహత్య

మల్లబ్బాయి

రోలుగుంట, న్యూస్‌టుడే: నిండుగొండ గ్రామానికి చెందిన అవుగడ్డ మల్లబ్బాయి (57) పురుగు మందు తాగి ఆత్మహత్యకు పాల్పడ్డాడు. ఎస్సై నాగకార్తిక్‌ తెలిపిన వివరాల ప్రకారం.. మల్లబ్బాయి, పద్మ దంపతుల కుమారుడు గణేష్‌ కాకినాడకు చెందిన ఓ ప్రైవేటు కంపెనీలో ఉద్యోగంలో చేరాడు. కొద్దిరోజుల కిందట కంపెనీకి చెందిన రూ.5 లక్షల నగదును తన ఖాతాకు మళ్లించుకుని పరారయ్యాడని యాజమాన్యం ఆరోపిస్తోంది. ఈ నెల 23న గౌరీపరమేశ్వరుల ఉత్సవాలకు గణేష్‌ సొంతూరుకి వచ్చి ఉండవచ్చనే అనుమానంతో కంపెనీకి చెందిన 15 మంది మూడు వాహనాల్లో నిండుగొండ చేరుకుని ఆరా తీశారు. ఈ విషయాన్ని గణేష్‌ సోదరి పార్వతి తండ్రి మల్లబ్బాయికి ఫోన్‌ చేసి చెప్పింది. దీంతో మనస్తాపానికి గురైన మల్లబ్బాయి పొలం పాకల వద్ద పురుగు మందు తాగి ఇంటికి వచ్చి కుప్పకూలిపోయాడు. కేసు నమోదు చేసినట్లు ఎస్సై చెప్పారు.