ఫార్మాలో చోరీల నివారణకు జాగ్రత్తలు తప్పనిసరి

డీఎస్పీ సునీల్‌ను సత్కరిస్తున్న సుబ్బారావు

పరవాడ, న్యూస్‌టుడే: పరవాడ ఫార్మాసిటీలో చోరీలు జరకుండా యాజమాన్యాలు జాగ్రతలు తీసుకోవాలని అనకాపల్లి డీఎస్పీ బి.సునీల్‌ సూచించారు. ఫార్మాసిటీలోని ఎంఏఎస్‌ఆర్‌ఎం (మ్యూచువల్లీ ఎయిడెడ్‌ సొసైటీ ఫర్‌ రిస్క్‌ మిటిగేషన్‌) భవనం వద్ద బుధవారం కంపెనీల యాజమాన్య ప్రతినిధులతో ఆయన సమావేశమయ్యారు. హెచ్‌ఆర్‌ విభాగం, ఉద్యోగుల మధ్య సత్సంబంధాలు ఉండాలన్నారు. కంపెనీల్లో ఏవైనా ఘటనలు జరిగితే వెంటనే పోలీసులకు సమాచారం ఇవ్వాలని సూచించారు. ప్రతి పరిశ్రమలో సీసీ కెమెరాలు ఏర్పాటు చేసుకోవాలన్నారు. మహిళా ఉద్యోగులతో దిశ యాప్‌ డౌన్‌లోడ్‌ చేయించాలని కోరారు. పరవాడ సీఐ ఈశ్వరరావు మాట్లాడుతూ వేసవిలో అగ్నిప్రమాదాలు జరగకుండా ఉద్యోగులకు ప్రత్యేక అవగాహన, శిక్షణ కార్యక్రమాలు నిర్వహించాలన్నారు. కార్యక్రమంలో ఎంఏఎస్‌ఆర్‌ఎం కార్యదర్శి సుబ్బారావు తదితరులు పాల్గొన్నారు.