మత్స్యకారుల సమస్యలపై ఆరా

మాట్లాడుతున్న సీబీఐ మాజీ జేడీ లక్ష్మీనారాయణ

జగదాంబకూడలి, న్యూస్‌టుడే: వైజాగ్‌ చేపల రేవు సమీపంలో ఉన్న జాలరిపేటను సీబీఐ మాజీ జె.డి. లక్ష్మీనారాయణ గురువారం సందర్శించారు. ‘సిటిజన్‌ రిపోర్ట్‌ కార్డ్‌-ఫోకస్డ్‌ గ్రూప్‌ డిస్కషన్‌’ కార్యక్రమంలో భాగంగా స్థానిక మత్య్స్యకాలతో మాట్లాడారు. డ్రైనేజీ, గంజాయి, మద్యం, భౌతిక దాడులు, నిరుద్యోగం వంటి వివిధ సమస్యలపై చర్చించారు. అనంతరం మత్స్యకారులు పలు సమస్యలను ఆయనకు వివరించారు. మత్స్యకార భరోసా అందడం లేదని, మహిళలకు వృద్ధాప్య పింఛన్లు ఇవ్వడం లేదని, వర్షాకాలంలో డ్రైనేజీల సమస్యలు తీవ్ర ఇబ్బందులకు గురిచేస్తున్నాయని, నిత్యావసర సరకుల ధరల పెరుగుదలతో తీవ్ర ఇబ్బందులు పడుతున్నామని తెలిపారు. సమస్యలను అధికారుల దృష్టికి తీసుకెళ్లి పరిష్కరించేందుకు కృషి చేస్తానని లక్ష్మీనారాయణ హామీ ఇచ్చారు.