ఆటోపై విరిగి పడిన చెట్టు

అక్కిరెడ్డిపాలెం, న్యూస్‌టుడే: జాతీయ రహదారి బీహెచ్‌పీవీ కూడలిలో భారీ చెట్టు విరిగి పడడంతో ఒకరికి గాయాలైన ఘటన శనివారం చోటు చేసుకుంది. ఆ వివరాలు.. బీహెచ్‌పీవీ- నాతయ్యపాలెం సేవా మార్గంలో ఓ ఆటో ప్రయాణిస్తున్న సమయంలో మార్గం పక్కన ఉన్న చెట్టు ఒకటి అకస్మాత్తుగా విరిగి ఆటోపై పడింది. ఆటో ముందు భాగం నుజ్జవడంతో పాటు, డ్రైవర్‌కు గాయాలయ్యాయి. ఈ ఘటనతో పరిసర ప్రాంత చిరు వ్యాపారులు, ప్రయాణికులు భయాందోళనతో పరుగులు తీశారు. డ్రైవర్‌ను చికిత్స నిమిత్తం ఆసుపత్రికి తరలించారు. గాజువాక ట్రాఫిక్‌ సీఐ ప్రసాద్‌ ఘటనా స్థలానికి చేరుకుని వివరాలు సేకరించారు. చెట్టును తొలగించి, ట్రాఫిక్‌ క్రమబద్ధీకరించారు.