కోర్టు కేసులపై ప్రత్యేక దృష్టిపెట్టండి

కార్పొరేషన్, న్యూస్‌టుడే : మహా విశాఖ నగరపాలక సంస్థకు సంబంధించి నమోదవుతున్న కోర్టు కేసుల పట్ల అధికారులు ప్రత్యేక దృష్టి కేంద్రీకరించాలని మేయర్‌ గొలగాని హరివెంకటకుమారి అన్నారు. బుధవారం జీవీఎంసీ ప్రధాన కార్యాలయంలో కమిషనర్‌ లక్ష్మీశ, ఏపీ హైకోర్టు ఎంఎస్‌సీ (మున్సిపల్‌ స్టాండింగ్‌ కౌన్సిల్‌) ఎన్‌.లక్ష్మీనారాయణరెడ్డితో కలిసి వివిధ విభాగాల అధికారులు, ప్రతినిధులతో సమావేశమయ్యారు. అవగాహనతోనే కోర్టు కేసుల నుంచి ఉపశమనం పొందగలమని, కోర్టు కేసులు నమోదు కాకుండా యంత్రాంగానికి చట్టపరమైన అంశాలపై అవగాహన కల్పించాలన్నారు. కమిషనర్‌ లక్ష్మీశ మాట్లాడుతూ కేసులు నిర్ణీత సమయాల్లో పరిష్కారమయ్యేలా చూడాలన్నారు. పట్టణ ప్రణాళిక విభాగంలో అధికంగా కేసులు నమోదవుతున్నాయన్నారు. రెవెన్యూ, ఇంజినీరింగ్, ప్రజారోగ్య విభాగాల నుంచి ఇటీవల పెరుగుతున్నాయన్నారు. ఎంఎస్‌సీ లక్ష్మీనారాయణరెడ్డి మాట్లాడుతూ, జిల్లాస్థాయి కోర్టుల్లోనే దాదాపు పరిష్కారమయ్యేలా అధికారులు చూడాలన్నారు. మూడేళ్లు లీజు పూర్తయిన వెంటనే తిరిగి వేలం ద్వారా దుకాణాలు అప్పగించాలని, పన్నులకు సంబంధించి డిమాండ్‌ నోటీసులు కచ్చితంగా జారీ చేయాలన్నారు. ఏడీసీలు రమణి, శ్రీనివాసరావు, వర్మ, ప్రధాన పట్టణ ప్రణాళికాధికారి ప్రభాకర్, ప్రధాన వైద్యాధికారి డాక్టర్‌ కేఎస్‌ఎల్‌జి శాస్త్రి, డీసీఆర్‌ నల్లనయ్య తదితరులు సమావేశంలో పాల్గొన్నారు.