‘కాపులకు అత్యధిక సీట్లు కేటాయించాలి’

సంఘీభావం తెలుపుతున్న కాపు సంఘం నాయకులు

జగదాంబకూడలి, న్యూస్‌టుడే: రానున్న సార్వత్రిక ఎన్నికల్లో ఉమ్మడి విశాఖ జిల్లాలలో కాపులకు అత్యధిక సీట్లు కేటాయించాలని కాపు సంఘం జిల్లా అధ్యక్షుడు ఏవీ రమణయ్య డిమాండ్‌ చేశారు. సోమవారం ఓ హోటల్‌లో కాపు సంఘం ముఖ్య నేతలతో ఆత్మీయ సమావేశాన్ని నిర్వహించారు. ఈ సందర్భంగా రమణయ్య మాట్లాడుతూ తాము ఏ పార్టీనీ విమర్శించబోమని అన్నారు. జనాభా ప్రాతిపదికన కాపులకు అత్యధిక సీట్లు కేటాయించాలని కోరుతున్నామన్నారు. గతంలో ప్రజారాజ్యం పార్టీ నాలుగు సీట్లు కేటాయించగా, నాలుగింటిలోనూ విజయం సాధించామన్నారు. తెదేపా, వైకాపా పార్టీలు కూడా తమకు కేటాయిస్తున్న సీట్లను గెలుపించుకుంటూ వస్తున్నామన్నారు. అన్ని నియోజకవర్గాలలో కాపుల ఓటు శాతం అధికంగా ఉందన్నారు. సంఘం కార్యదర్శి బొండా అప్పారావు, కంపర సత్తిబాబు, మురళీకృష్ణ, నారాయణరావు, సన్యాసిరావు, శ్రీహరి, కంపర కోటేశ్వరరావు తదితరులు పాల్గొన్నారు.