తండ్రికి ఉద్యోగం.. కొడుక్కి రాష్ట్రస్థాయి ర్యాంకు

తెలంగాణ ఎంసెట్‌లో పొడుగుపాలెం విద్యార్థి ప్రతిభ

రోహిత్‌కు స్వీటు తినిపిస్తున్న తల్లిదండ్రులు

కె.కోటపాడు, న్యూస్‌టుడే: ఎ.కోడూరు శివారు పొడుగుపాలెంకు చెందిన వంటాకు రోహిత్‌ శుక్రవారం తెలంగాణ ఎంసెట్‌లో (అగ్రికల్చర్‌ అండ్‌ ఫార్మసీ విభాగం) రెండో ర్యాంకు సాధించాడు. ఈ విద్యార్థికి 200కి 153 మార్కులు వచ్చాయి. ఇతని తండ్రి గౌరునాయుడు, తల్లి దేముడమ్మ వ్యవసాయం చేస్తుంటారు. గౌరునాయుడు ఎంఎస్సీ, ఎంఈడీ చదువుకుని ప్రైవేటు ఉద్యోగం, వ్యవసాయం చేస్తూ కుటుంబాన్ని పోషిస్తున్నారు. 98 డీఎస్‌సీలో క్వాలిఫై అవడంతో ఇటీవలే ఉపాధ్యాయ ఉద్యోగానికి ఎంపికయ్యారు. ఈ కుటుంబంలో ఈ సంతోషాన్ని రెట్టింపు చేస్తూ.. ఆయన కుమారుడు రోహిత్‌ తెలంగాణ ఎంసెట్‌లో రెండో ర్యాంకు సాధించాడు. ఈ విద్యార్థి ఒకటి నుంచి పదో తరగతి వరకు నర్సీపట్నంలో, ఇంటర్‌ బైపీసీ రాజమహేంద్రవరంలో పూర్తి చేశాడు. రోహిత్‌ ‘న్యూస్‌టుడే’తో మాట్లాడుతూ ర్యాంకు సాధించడం ద్వారా తల్లిదండ్రుల ఆశను నెరవేర్చానన్న ఆనందం దక్కిందన్నాడు.