రిమాండ్‌ ఖైదీపై ఏఎస్‌ఐ దాడి

కేసు నమోదుకు న్యాయమూర్తి ఆదేశం

విశాఖ లీగల్‌, న్యూస్‌టుడే: విచారణకు న్యాయస్థానానికి హాజరైన రిమాండ్‌ ఖైదీపై దాడి చేసిన ఏఎస్‌ఐపై కేసు నమోదు చేయాలని, నిందితునికి చికిత్స అందించాలని ఒకటో అదనపు ప్రధాన మెట్రోపాలిటన్‌ మేజిస్ట్రేట్‌ న్యాయస్థానం న్యాయమూర్తి యుగంధర్‌ ఆదేశించారు. ఘటనకు సంబంధించిన వివరాలు ఇలా ఉన్నాయి. నగరంలోని ఆదర్శనగర్‌ ప్రాంతానికి చెందిన జి.ధనేష్‌ భార్యను వేధించిన కేసులో రిమాండ్‌లో ఉన్నారు. విచారణలో భాగంగా పోలీసులు నిందితుడ్ని శుక్రవారం ఒకటో అదనపు ప్రధాన మెట్రోపాలిటన్‌ మేజిస్ట్రేట్‌ న్యాయస్థానానికి తీసుకొచ్చారు. అతన్ని చూడటానికి తల్లిదండ్రులు, సోదరి వచ్చారు. నిందితుడు తల్లితో మాట్లాడటానికి ప్రయత్నించగా ఏఎస్‌ఐ వారించారు. దీంతో ఇద్దరి మధ్య వాగ్వాదం జరిగింది. ఆగ్రహించిన ఏఎస్‌ఐ ధనేష్‌ను కొట్టి గాయపరిచాడు. ఈ మేరకు నిందితుడు న్యాయవాది ద్వారా న్యాయమూర్తికి ఫిర్యాదు చేశాడు. పరిశీలించిన న్యాయమూర్తి సంబంధిత పోలీసు అధికారిపై కేసు నమోదు చేసి విచారణ చేపట్టాలని, నిందితునికి వైద్య సహాయం అందించాలని రెండో పట్టణ పోలీస్‌స్టేషన్‌ సీఐ వెంకటరావును ఆదేశించారు.