‘అమర్‌కు పాలన చేతకాకే తెదేపాపై విమర్శలు’

శిబిరంలో మాట్లాడుతున్న మాజీ ఎమ్మెల్యే పీలా

కశింకోట, న్యూస్‌టుడే: మంత్రి గుడివాడ అమర్‌నాథ్‌కు రాజకీయ బిక్ష పెట్టింది తెదేపాయే అని మాజీ ఎమ్మెల్యే పీలా గోవింద సత్యనారాయణ గుర్తు చేశారు. వైకాపా ప్రభుత్వం ఎన్టీఆర్‌ ఆరోగ్య విశ్వవిద్యాలయ పేరుమార్చడాన్ని నిరసిస్తూ కశింకోటలో గురువారం రిలే నిరాహార దీక్షలు చేశారు. శిబిరాన్ని పీలా గోవింద సందర్శించారు. తొలుత జాతీయ రహదారి పక్కన ఉన్న ఎన్టీఆర్‌, బసవతారకం విగ్రహాలకు పాలాభిషేకం చేసి, పూలమాలలు వేసి నివాళులర్పించారు. ఒక్క వైద్య కళాశాలా నిర్మించలేని ప్రభుత్వానికి ఎన్టీఆర్‌ పేరును తొలగించే హక్కు లేదన్నారు. నిర్మించడం చేతకానివాడికి తొలగించే హక్కు ఎక్కడి నుంచి వస్తుందని ప్రశ్నించారు. మంత్రి అమర్‌కు తెదేపాపై విమర్శలు చేయడం తప్ప అభివృద్ధి చేయడం చేతకాదన్నారు. కార్యక్రమంలో తెదేపా నాయకులు ఉగ్గిన రమణమూర్తి, కాయల మురళీధర్‌, పెంటకోట రాము, సిదిరెడ్డి శ్రీనివాసరావు, వేగి వెంకటరావు, తాకాశి కృష్ణ, కలగా సోమేశ్వరరావు, బుదిరెడ్డి గంగయ్య, జెర్రిపోతుల నూకినాయుడు తదితరులు పాల్గొన్నారు.