బురద దాటితేనే బడికి!!

చంద్రంపాలెం ఉన్నత పాఠశాల మైదానంలో విద్యార్థుల అవస్థలు

కొమ్మాది, న్యూస్‌టుడే: రాష్ట్రంలోనే అత్యధిక విద్యార్థులున్న పాఠశాలల్లో చంద్రంపాలెం ఉన్నత పాఠశాల ఒకటి. అలాంటిచోట పరిస్థితిని పై చిత్రంలో చూడొచ్చు. శుక్రవారం వర్షానికి క్రీడామైదానం బురదమయమైంది. విద్యార్థులు తరగతి గదులకు వెళ్లేందుకు  ఇబ్బందులకు గురయ్యారు. ఈ సమస్యపై పలుమార్లు ‘ఈనాడు’లో కథనాలు ప్రచురించడంతో ఎమ్మెల్యే ముత్తంశెట్టి స్పందించారు. క్రీడామైదానం అభివృద్ధికి ప్రణాళిక రూపొందించాలని అధికారులకు ఆదేశించారు. ఆ మేరకు గత నెల 19న భీమిలి నియోజకవర్గ వైకాపా సమన్వయకర్త ముత్తంశెట్టి మహేష్‌ నేతృత్వంలో జీవీఎంసీ, సమగ్రశిక్ష అధికారులు పాఠశాల క్రీడామైదానాన్ని పరిశీలించారు. వర్షపునీరు నిలవకుండా డ్రైనేజీ వ్యవస్థ ఏర్పాటు చేయాలని, నాడు-నేడులో మంజూరైన రూ.15 లక్షలతో వెంటనే పనులు చేపట్టాలని నిర్ణయించారు. అయినా నేటికీ కార్యరూపం దాల్చలేదు.