‘జయహో బీసీ’ సభకు 59 ఆర్టీసీ బస్సులు

హనుమంతువాక వద్ద నిరీక్షిస్తున్న ప్రయాణికులు

కార్పొరేషన్‌, న్యూస్‌టుడే: రాష్ట్ర ప్రభుత్వం బుధవారం విజయవాడలో నిర్వహించనున్న జయహో బీసీ సభకు విశాఖ నగరం నుంచి 59 బస్సులను ఆర్టీసీ సమకూర్చింది. వాటిలో సిటీ బస్సులు 15 కాగా, మిగతావి అల్ట్రాడీలక్స్‌, సూపర్‌ లగ్జరీలు ఉన్నాయి. విజయనగరం, శ్రీకాకుళం, టెక్కలి, పలాస, రాజమహేంద్రవరం, కాకినాడ నుంచి కూడా బస్సులు సభకు వెళ్లిపోవడంతో మంగళవారం ప్రయాణికులు తీవ్ర ఇబ్బందులు పడ్డారు. సర్దుబాటులో భాగంగా ఆర్టీసీ అధికారులు ఆర్డినరీ సర్వీసులను ఎక్స్‌ప్రెస్‌లుగా నడిపారు. అయినా కొరత నెలకొనడంతో బస్‌స్టాపుల్లో ప్రయాణికులు పడిగాపులు కాసి, చివరకు ప్రయివేటు వాహనాలను ఆశ్రయించాల్సి వచ్చింది. నగరంలోనూ సిటీ బస్సులు తగ్గిపోవడంతో పాఠశాలలు, కళాశాలలకు వెళ్లే విద్యార్థులతోపాటు, పాసులపై వెళ్లేవారు ఆటోలను ఆశ్రయించడం కనిపించింది. తరచూ ప్రభుత్వ కార్యక్రమాలకు ఆర్టీసీ బస్సులను వినియోగిస్తుండడంతో సాధారణ ప్రయాణికులు ఆర్టీసీ బస్సుల నుంచి ప్రయివేటు వాహనాల వైపు మళ్లుతున్నారు.