ఎన్నికలు ఎప్పుడొచ్చినా సిద్ధంగా ఉండాలి

ప్రగడతో అధినేత చంద్రబాబు

అధినేతకు పార్టీ పరిస్థితి వివరిస్తున్న నాగేశ్వరరావు

అచ్యుతాపురం, న్యూస్‌టుడే: ‘నాగేశ్వరరావు ఆరోగ్యం ఎలా ఉంద’ని తెదేపా అధినేత నారా చంద్రబాబునాయుడు ఎలమంచిలి నియోజకవర్గ ఇన్‌ఛార్జి ప్రగడ నాగేశ్వరరావును ఆత్మీయంగా పలకరించారు. అమరావతిలో బుధవారం చంద్రబాబునాయుడుతో ప్రగడ సమావేశమయ్యారు. ఇటీవల కిడ్నీ మార్పిడి చేయించుకున్న ప్రగడతో ఆరోగ్య విషయాలను మాట్లాడుతూనే పార్టీ అభివృద్ధికి తీసుకోవాల్సిన చర్యలపై చర్చించారు. నియోజకవర్గంలో తెదేపా బలం, బలహీనతలు తన వద్ద ఉన్న సమాచారాన్ని ప్రగడతో పంచుకోవడంతో పాటు సమస్యలపై అధినేత నేరుగా మాట్లాడారు. ఎన్నికలు ఎప్పుడు వచ్చినా ఎదుర్కోవడానికి సిద్ధంగా ఉండాలని సూచించారని ప్రగడ తెలిపారు. నిరంతరం ప్రజల్లో ఉంటూ వైకాపా ప్రభుత్వం అనుసరిస్తున్న ప్రజా వ్యతిరేక విధానాలపై ప్రజలను జాగృతి చేయాలని చెప్పారని ప్రగడ పేర్కొన్నారు.