అంతులేని ఆర్తనాదం

ఒకే ఒక్క అడుగు అలా ముందుకు పడింది..
అంతే...ప్రమాదం చుట్టేసింది!
విద్యార్థిని నిత్యం ప్రయాణించే రైలే..
రోజూ దిగే రైల్వే స్టేషనే..
అయినా...బుధవారం ఉదయం
ఆ క్షణంలో ఊహకందని ప్రమాదమిది!!
ఉదయం 8.42 గంటలకు...
ఆగిన రైలు... ప్లాట్‌ఫాంకు మధ్యలోకి
ఆమె హఠాత్తుగా  జారిపోయింది!
దువ్వాడ రైల్వే స్టేషన్‌లో
ఒక్కసారిగా అలజడి రేగింది!
క్షణాలు..నిమిషాలు గడిచే కొద్దీ
ఎటూ కదల్లేని స్థితిలో...
అటు తిరగాలంటే భారీ రైలు బోగీ
ఇటు తిరగాలంటే కాంక్రీటు గోడ
నడుమ నలిగిపోతున్న శరీరం!
విద్యార్థిని శశికళ రోదిస్తూ...
కన్నీటిపర్యంతమవుతూ...బాధను భరిస్తూ
చేసిన ఆర్తనాదాలు అయ్యో! అనిపించాయి.!!
ఎంసీఏ మొదటి ఏడాది చదువుతున్న ఈ విద్యార్థిని  గంటన్నరపాటు పడిన యాతన అంతా ఇంతా కాదు. రైల్వే యంత్రాంగం శ్రమించి బయటకు తీసి...ఆసుపత్రికి తరలించింది. వైద్యుల పర్యవేక్షణలో చికిత్స పొందుతోంది. -న్యూస్‌టుడే, కూర్మన్నపాలెం