కత్తితో దాడి కేసులో నిందితుడి అరెస్టు

తాటిచెట్లపాలెం, న్యూస్‌టుడే: కత్తితో దాడి చేసిన వ్యక్తిని కంచరపాలెం పోలీసులు బుధవారం అరెస్టు చేశారు. దీనికి సంబంధించి పోలీసులు తెలిపిన వివరాలిలా.. కంచరపాలెం మెట్టు ప్రాంతంలో ఉంటున్న కామేశ్వరరావు, మస్తాన్‌ చిల్లర వ్యాపారులు. వీరు రోడ్లపై తలదాచుకునే కూలీలు, యాచకులను భయపెట్టి డబ్బులు వసూలు చేస్తుంటారు. మంగళవారం రాత్రి కామేశ్వరరావు.. మస్తాన్‌ను పిలిచి తనకు రావాల్సిన డబ్బుల గురించి అడిగాడు. ఆగ్రహించిన అతడు కామేశ్వరరావుపై కత్తితో దాడి చేయగా తీవ్రంగా గాయపడిన విషయం తెలిసిందే. బాధితుడి ఫిర్యాదు మేరకు హత్యాయత్నం కేసు నమోదు చేసిన పోలీసులు బుధవారం మస్తాన్‌ను అరెస్టు చేసి కోర్టులో హాజరు పరిచారు. న్యాయమూర్తి ఆదేశాల మేరకు నిందితుడిని రెండు వారాల రిమాండ్‌కు తరలించినట్లు సీఐ విజయకుమార్‌ పేర్కొన్నారు.