ఎమ్మెల్సీ ఓటర్లలో పురుషులదే పైచేయి

వన్‌టౌన్‌, న్యూస్‌టుడే: ఉత్తరాంధ్ర పట్టభద్రుల శాసనమండలి (ఎమ్మెల్సీ) ఓటర్లలో పురుష ఓటర్లదే పైచేయిగా ఉంది. మొత్తం ఓటర్లలో 63.01 శాతం పురుషులు, 36.97 శాతం మహిళలు, ఇతరులు 0.02 శాతం ఉన్నారు. రాష్ట్ర ఎన్నికల సంఘం ఇటీవల పట్టభద్రుల ఎమ్మెల్సీ ఎన్నికకు సంబంధించి తుది ఓటరు జాబితాను వెలువరించింది. ఉత్తరాంధ్ర పరిధిలోని శ్రీకాకుళం, విజయనగరం, మన్యం పార్వతీపురం, అల్లూరిసీతారామరాజు, విశాఖపట్నం, అనకాపల్లి జిల్లాల్లో 2,83,749 మంది ఓటర్లు ఉన్నారు. వీరిలో పురుషులు 1,78,796, మహిళలు 1,04,913, ఇతరులు 40 మంది ఉన్నారు.

త్వరలో నోటిఫికేషన్‌

ఎమ్మెల్సీ ఎన్నికలకు సంబంధించి పండగ తర్వాత ఏక్షణమైనా ఎన్నికల నోటిఫికేషన్‌ విడుదలయ్యే అవకాశం ఉంది, 2017లో ఫిబ్రవరి-మార్చి నెలల్లో ఎన్నిక జరిగింది. ప్రస్తుత సిట్టింగ్‌ ఎమ్మెల్సీ పీవీఎన్‌ మాధవ్‌ పదవీ కాలం మార్చి 17వ తేదీతో ముగియనున్నది. ఈ నేపథ్యంలో వచ్చే నెలలో ఎన్నికల నోటిఫికేషన్‌ విడుదలయ్యే అవకాశం ఉందని అధికార వర్గాలు భావిస్తున్నాయి. తుది ఓటరు జాబితాలు ప్రకటించినప్పటికీ అర్హులు ఇంకా ఎవరైనా ఉంటే పేర్లు నమోదు చేసుకోవడానికి అవకాశం ఉంది. నామపత్రాల స్వీకరణకు ఏడు రోజుల ముందు వరకు దరఖాస్తులు చేసుకోవచ్చునని అధికారులు తెలిపారు.