మనస్తాపంతో డ్రైవర్‌ ఆత్మహత్య

మృతి చెందిన శ్రీనివాస్‌

పరవాడ, న్యూస్‌టుడే : భార్య పుట్టింటికి వెళ్లి తిరిగి రాలేదన్న మనస్తాపంతో భర్త ఆత్మహత్య చేసుకున్న ఘటన గురువారం అర్ధరాత్రి పరవాడ మండలం గొర్లెవానిపాలెం జేఎన్‌ఎన్‌యూఆర్‌ఎం కాలనీలో చోటు చేసుకుంది. శుక్రవారం పరవాడ సీఐ ఈశ్వరరావు తెలిపిన వివరాల మేరకు.. స్థానికంగా నివాసం ఉంటున్న వ్యాన్‌ డ్రైవర్‌ ఎస్‌.శ్రీనివాస్‌(35)కి ఏడాదిన్నర కిందట నర్సీపట్నం ప్రాంతానికి చెందిన యువతితో వివాహమైంది. వీరి మధ్య తరచూ గొడవలు జరుగుతుండడంతో... భార్య పుట్టింటికి వెళ్లి తిరిగిరాలేదు. దీంతో శ్రీనివాస్‌ ఇంట్లోనే ఉరేసుకున్నారు. శుక్రవారం ఉదయం అదే కాలనీలో ఉంటున్న తల్లిదండ్రులు వెళ్లి చూడగా మృతి చెంది ఉన్నాడు. మృతుడి తల్లి వరలక్ష్మి ఫిర్యాదుతో పోలీసులు కేసు నమోదు చేసి దర్యాప్తు చేస్తున్నారు.