తూకాల్లో మోసాలకు పాల్పడితే కఠిన చర్యలు

సమావేశంలో మాట్లాడుతున్న జేసీ కె.ఎస్‌.విశ్వనాథన్‌

వన్‌టౌన్‌, న్యూస్‌టుడే: వినియోగదారులు తమ హక్కులపై అవగాహన కలిగి ఉంటే నష్టపోకుండా జాగ్రత్త పడవచ్చునని జిల్లా సంయుక్త కలెక్టర్‌ కె.ఎస్‌.విశ్వనాథన్‌ అన్నారు. మంగళవారం సాయంత్రం కలెక్టర్‌ కార్యాలయ సమావేశమందిరంలో జరిగిన జిల్లా స్థాయి వినియోగదారుల హక్కుల రక్షణ మండలి సమావేశంలో జేసీ పాల్గొని మాట్లాడారు. రైతుబజార్లు, కిరణా దుకాణాల్లో తూకాలు సక్రమంగా లేకుంటే కేసులు నమోదు చేయాలన్నారు. కల్తీ నూనెలు విక్రయిస్తే కఠిన చర్యలు తీసుకోవాలని ఆహార తనిఖీ అధికారులను ఆదేశించారు. కొనుగోలు చేసే సమయంలో వస్తువు నాణ్యత పరిశీలించాలని, ప్రకటనలకు ఆకర్షితులై మోసపోకూడదన్నారు. మోసపోతే వినియోగదారుల రక్షణ చట్టం కింద పరిహారం పొందే అవకాశం ఉందన్నారు. ప్రయివేటు మెడికల్‌ ల్యాబ్స్‌లో సరైన ప్రమాణాలు పాటించడం లేదని, చాలా చోట్ల అనుమతులు లేకుండా నడుస్తున్నాయని పలువురు వినియోగదారుల సంఘం సభ్యులు జేసీ దృష్టికి తీసుకొచ్చారు. గ్రామ, వార్డు సచివాలయాల వారీ ప్రయివేటు ల్యాబ్స్‌ను తనిఖీ చేసి నివేదిక అందించాలని అధికారులను ఆదేశించారు. గ్యాస్‌ డెలివరీకి డబ్బులు వసూలు చేస్తే ఫిర్యాదు చేయాలన్నారు. కార్యక్రమంలో డీసీఎస్‌ఓ సూర్యప్రకాశరావు, వివిధ శాఖల అధికారులు, వినియోగదారు సంఘాల ప్రతినిధులు పాల్గొన్నారు.