మెరిసిన ఆలోచన

రోబో నమూనాతో గుర్తింపు
మధురవాడ గురుకుల విద్యార్థినుల ప్రతిభ

విద్యార్థినులను అభినందిస్తున్న కలెక్టర్‌ మల్లికార్జున. చిత్రంలో గురుకులాల సమన్వయకర్త రూపవతి, ఏటీఎల్‌ ఇన్‌ఛార్జి రాంబాబు

కొమ్మాది, న్యూస్‌టుడే: మధురవాడ రిక్షాకాలనీలోని డాక్టర్‌ బి.ఆర్‌.అంబేడ్కర్‌ గురుకుల ప్రతిభ పాఠశాల/కళాశాలకు చెందిన ముగ్గురు విద్యార్థినులు ‘డాక్టర్‌ రాడ్‌ రోబో’ నమూనా రూపొందించి ప్రతిభ చాటారు. నీతిఆయోగ్‌, అటల్‌ ఇన్నోవేషన్‌ మిషన్‌, అటల్‌ టింకరింగ్‌ ల్యాబ్‌లు సంయుక్తంగా నిర్వహించిన ‘అటల్‌ ఇన్నోవేషన్‌ మారథాన్‌-2022’కు వివిధ రాష్ట్రాల నుంచి 16వేల మంది విద్యార్థులు 7వేల నమూనాలను పంపించారు. మొదటి విడతలో ఎంపికైన 350 నమూనాల్లో ఈ గురుకులానికి చెందిన వై.జెస్సిక (10వ తరగతి), కె.వర్షిణి ప్రియాంక (9వ తరగతి), కె.రేష్మాబిందు (9వ తరగతి) రూపొందించిన ‘డాక్టర్‌ రాడ్‌ రోబో’ నమూనాకు చోటు  దక్కింది. 350 నమూనాల విద్యార్థులకు రెండు, మూడు దశల్లో ఇంటర్వ్యూలు నిర్వహించగా ‘టాప్‌-10’లో ఒకటిగా నిలిచింది. ఈ ఏడాది జనవరి 9 నుంచి 14 వరకు బెంగళూరులో డెల్‌ టెక్నాలజీస్‌, లెర్నింగ్‌ లింక్‌ ఫౌండేషన్‌ సంస్థలు ఆహ్వానించగా పదోతరగతి విద్యార్థిని వై.జెస్సిక నేరుగా, వర్షిణి ప్రియాంక, రేష్మాబిందులు వీడియో కాన్ఫరెన్స్‌లో రోబో పనితీరును వివరించి టాప్‌-4లో నిలిచారు.
కలెక్టర్‌ ప్రశంసలు: మారుమూల ప్రాంతాల్లో రోగులకు ప్రాథమిక రోగాలు (జ్వరం, దగ్గు, జలుబు తదితర..) వస్తే వాటికి సంబంధించిన మందులను డాక్టర్‌ రాడ్‌(ఆర్‌ఏడీ- రోబో అసిస్టెంట్‌ ఫర్‌ డాక్టర్‌)రోబో తెలిపేలా రూపకల్పన చేశారు. బుధవారం కలెక్టరేట్‌లో ఈ నమూనా పనితీరును వివరించారు. విద్యార్థినులను, గైడ్‌, ఏటీఎల్‌ ఇన్‌ఛార్జి టి.రాంబాబును  కలెక్టర్‌ మల్లికార్జున, జేసీ విశ్వనాథన్‌ అభినందించారు. గురుకులాల సమన్వయకర్త ఎస్‌.రూపవతి, ప్రిన్సిపల్‌ నిర్మల పాల్గొన్నారు.

మరిన్ని హంగులతో తీర్చిదిద్దనున్నాం..
-వై.జెస్సిక, కె.వర్షిణిప్రియాంక, కె.రేష్మాబిందు

కోరిన ట్యాబ్లెట్‌ రోబో వద్దే రోగి తీసుకునేలా హంగులు అద్దనున్నాం. వైద్యునికి వీడియో కాల్‌ చేసేలా, వైద్యుడు ఆసుపత్రుల్లో అందుబాటులో లేకపోయినా వైద్యసేవలు అందేలా నూతన సాంకేతిక పరిజ్ఞానంతో ఈ నమూనాను మెరుగుపరుస్తాం.