నకిలీ అధికారి గుట్టురట్టు

కశింకోట, న్యూస్‌టుడే: జిల్లా విద్యాశాఖ కార్యాలయం నుంచి వచ్చానంటూ తనిఖీల పేరిట హడావుడి చేయబోయిన మోసగాడు ఉపాధ్యాయుల చేతికి చిక్కాడు. కశింకోట డీపీఎన్‌ జిల్లా పరిషత్తు ఉన్నత పాఠశాలకు శనివారం ఓ వ్యక్తి వచ్చాడు. తాను జిల్లా విద్యాశాఖాధికారి కార్యాలయం నుంచి వచ్చానని, మధ్యాహ్న భోజన పథకం అమలును తనిఖీ చేయాల్సి ఉందని చెప్పాడు. అతడి తీరును చూసిన అనుమానించిన ప్రధానోపాధ్యాయుడు ఎ.శ్రీధర్‌రెడ్డి వెంటనే జిల్లా  విద్యాశాఖాధికారి కార్యాలయానికి ఫోన్‌ చేసి ఆరాతీశారు. తాము ఎవర్నీ తనిఖీలకు పంపలేదని అక్కడి అధికారులు చెప్పారు. దీంతో గుర్తింపు కార్డు చూపాలని ఆ వ్యక్తిని అడగ్గా.. తాను విధుల్లో చేరి వారం రోజులే అయిందని పేర్కొన్నాడు. ప్రొసీడింగ్స్‌ చూపమని అడిగితే ప్రిన్సిపల్‌ సెక్రటరీ పేరుతో ఉన్న కాగితాలను చూపాడు. అవి నకిలీవని గుర్తించి అతడిని మూడు గంటలపాటు పాఠశాలలో ఉంచారు. పోలీసులకు ఫిర్యాదు చేస్తామని చెప్పగా.. క్షమించాలంటూ వేడుకున్నాడని హెచ్‌ఎం చెప్పారు. అతడి ఆధాô్ వివరాలు, ఇతర ధ్రువపత్రాల నకళ్లను తీసుకుని పంపినట్లు పేర్కొన్నారు. వారం రోజుల్లో ఇతడు రోలుగుంట మండలంలోని నాలుగు పాఠశాలను సందర్శించినట్లు విజిట్‌ రిపోర్టు చూపాడని చెప్పారు. ప్రధానోపాధ్యాయులు, ఉపాధ్యాయులు ఇలాంటి వ్యక్తుల విషయంలో అప్రమత్తంగా ఉండాలని సూచించారు.