పారిశుద్ధ్య కార్మిక పోస్టులకు బేరాలు!

వైకాపా ప్రజాప్రతినిధుల వ్యూహాలు

కార్పొరేషన్‌, న్యూస్‌టుడే: చెత్త సేకరణ కార్మికులుగా అవకాశం కల్పిస్తామని పలువురు వైకాపా ప్రజాప్రతినిధులు బేరసారాలు ప్రారంభించారు. నగరంలో గృహాలు, వాణిజ్య సముదాయాల నుంచి చెత్త సేకరించడానికి అవసరమైన కార్మికుల నియామకానికి కౌన్సిల్‌ ఆమోదం తెలిపింది. దీంతో అధికార పార్టీకి చెందిన ప్రజాప్రతినిధులు కొందరు ఒక్కో నియామకానికి రూ.1.50లక్షల నుంచి రూ.2లక్షలు వరకు వసూలు చేయడానికి రంగం సిద్ధం చేస్తున్నారు. 595 మంది కార్మికులతో ఈ నెల 11 నుంచి మార్చి 31 వరకు తాత్కాలిక ప్రాతిపదికన పనిచేయించడానికి ఇటీవల కౌన్సిల్‌ సమావేశంలో ఆమోదం లభించింది. ఈ నేపథ్యంలో నియామకం పూర్తయి గడువు ముగిసిన తరువాత వారిని కొనసాగించేలా పలువురు పాలకవర్గ సభ్యులు పావులు కదుపుతున్నారు. నియామకాలకు గడువు దగ్గర పడుతుండటంతో డబ్బులిచ్చిన వారి జాబితాను త్వరలో జీవీఎంసీకి అందజేయనున్నారు. ఉదయం 6 గంటల నుంచి ఉదయం 9 గంటల వరకు పనిచేసే కార్మికునికి రోజుకు రూ.549 వేతనం ఇవ్వాలని జీవీఎంసీ నిర్ణయించింది. నెలలో 26 రోజులకుగానూ రూ.14,274 వేతనం ఒక్కొక్కరికి అందనుంది. ఉదయం 9 గంటల తరువాత ఏదైనా పనిచేసుకోవడానికి కార్మికుడికి అవకాశం ఉండటంతో ఈ పోస్టులకు డిమాండ్‌ నెలకొంది. అధికార పార్టీకి చెందిన పలువురు ప్రజాప్రతినిధులు తమ అనుచరులు, కార్యకర్తలతో జాబితా తయారు చేయించే పనిలో నిమగ్నమై ఉన్నారు.