అంగన్‌వాడీ కార్యకర్తల పోరుబాట

ఆందోళనలో పాల్గొన్న అంగన్‌వాడీ కార్యకర్తలు

కార్పొరేషన్‌, న్యూస్‌టుడే: అంగన్‌వాడీ కార్యకర్తలకు కనీస వేతనాలు అమలు చేయాలని ఏపీ అంగన్‌వాడీ వర్కర్స్‌, హెల్పర్స్‌ (సీఐటీయూ) గౌరవాధ్యక్షులు పి.మణి డిమాండ్‌ చేశారు. ఈ మేరకు సోమవారం జీవీఎంసీ గాంధీ విగ్రహం వద్ద ఆందోళన నిర్వహించారు. రూ.26 వేల వేతనం ఇవ్వాలని నినాదాలు చేశారు. సీఐటీయూ రాష్ట్ర ఉపాధ్యక్షులు కేఎం శ్రీనివాసరావు మాట్లాడుతూ కలెక్టర్‌ కార్యాలయానికి రావద్దని అర్ధరాత్రి నాయకులకు పోలీసులు నోటీసులు ఇవ్వడం దారుణమన్నారు. జిల్లా ప్రధాన కార్యదర్శి ఎల్‌.దేవి మాట్లాడుతూ అంగన్‌వాడీ ఉపాధ్యాయులకు ప్రభుత్వం ఇచ్చిన చరవాణులు పనిచేయడం లేదన్నారు. సంఘం జిల్లా ప్రధాన కార్యదర్శి ఆర్‌కేఎస్‌వీ కుమార్‌ మాట్లాడుతూ గత మూడ్నెళ్లుగా కార్మికులకు వేతనాలు ఇవ్వకపోవడం దారుణమన్నారు.  అనంతరం అర్బన్‌-2 సీడీపీఓ శ్రీలతకు వినతిపత్రం అందజేశారు.