కనులవిందుగా కార్నివాల్‌

బీచ్‌ రోడ్డులో కళాకారుల కూచిపూడి నృత్య ప్రదర్శన

ఈనాడు డిజిటల్‌, విశాఖపట్నం: జీ20 సన్నాహక సదస్సుల సందర్భంగా సాగర తీరంలో ఆదివారం సాయంత్రం ఏర్పాటు చేసిన ‘వైజాగ్‌ కార్నివాల్‌’ ఆకట్టుకుంది. వైఎంసీఏ కూడలి నుంచి ఆర్కే బీచ్‌ వరకు సాగిన ఈ ప్రదర్శన జాతరను తలపించింది. రాష్ట్రంలోని వివిధ ప్రాంతాల నుంచి వచ్చిన కళాకారులు కూచిపూడి, థింసా, కోలాటం, తప్పెటగుళ్లు, గరగ నృత్యం, పులివేషాలు, కర్రసాము, కత్తిసాము, గిరిజన నృత్యాలు ప్రదర్శించారు. అనంతరం ఆర్కే బీచ్‌ వద్ద సాంస్కృతిక కార్యక్రమాలు ఏర్పాటు చేశారు. మంత్రులు గుడివాడ అమర్‌నాథ్‌, ఆదిమూలపు సురేష్‌, పురపాలకశాఖ ప్రత్యేక కార్యదర్శి శ్రీలక్ష్మి, కలెక్టర్‌ మల్లికార్జున, మేయర్‌ హరి వెంకట కుమారి, ఎమ్మెల్సీ వరుదు కల్యాణి, జీవీఎంసీ కమిషనర్‌ రాజాబాబు, జేసీ కె.ఎస్‌.విశ్వనాథన్‌, తదితరులు పాల్గొన్నారు. ఆదివారం కావడంతో పెద్ద ఎత్తున తరలివచ్చిన సందర్శకులతో బీచ్‌ రోడ్డులో రద్దీ నెలకొంది.

ఆకట్టుకున్న గిరిజన నృత్యం

యువకుడి విన్యాసం