కలప డిపోలో అటవీ కార్యాలయం

నర్సీపట్నం అర్బన్‌, న్యూస్‌టుడే: జిల్లా అటవీ శాఖ కార్యాలయాన్ని శివపురంలో ప్రభుత్వ డిగ్రీ కళాశాల ఎదురుగా ఉన్న కలప డిపోలోకి సోమవారం మార్పు చేశారు. రేంజ్‌ కార్యాలయం, సబ్‌ డీఎఫ్‌వో కార్యాలయం నిర్వహించే గదుల్లో ఇక నుంచి జిల్లా అటవీ కార్యాలయం కొనసాగనుంది. రేంజ్‌ కార్యాలయాన్ని రేంజ్‌ అధికారి క్వార్టర్‌లోకి మార్చారు. జిల్లాల పునర్విభజన సమయంలోనే సబ్‌ డీఎఫ్‌ఓ పోస్టును ఎలమంచిలికి మార్చారు. డీఎఫ్‌ఓ బి.రాజారావు మాట్లాడుతూ.. ఇప్పటివరకు కొనసాగిన భవనం శిథిలం కావడంతో కలప డిపోలోని భవనంలోకి మార్పు చేసినట్లు చెప్పారు. వచ్చే ఆర్థిక సంవత్సరంలో 40 హెక్టార్లలో కొత్తగా ప్లాంటేషన్లు వేయడానికి ప్రతిపాదించామన్నారు. అటవీ అభివృద్ధికి పదేళ్ల ప్రణాళిక రూపొందించి ఉన్నతాధికారుల ఆమోదానికి పంపినట్లు పేర్కొన్నారు.