తంతడి తీరంలో డెవిల్‌

అచ్యుతాపురం, న్యూస్‌టుడే: అచ్యుతాపురం మండలం తంతడి-వాడపాలెం సముద్రతీరంలో నందమూరి కళ్యాణ్‌రామ్‌ హీరోగా నటిస్తున్న కొత్త చిత్రం షూటింగ్‌ జరిగింది. అభిషేక్‌ పిక్చర్స్‌ బ్యానర్‌పై ‘డెవిల్‌’ పేరుతో తెరకెక్కుతున్న ఈ సినిమాలో సుమిత్రా మీనా హీరోయిన్‌గా నటిస్తున్నారు. స్వాతంత్య్రానికి ముందు 1945 సంవత్సరంలో జరిగిన ఘట్టాల ఆధారంగా ఈ సినిమా రూపొందుతోందని యూనిట్‌ వర్గాలు వెల్లడించాయి. ఇప్పటికే 75 శాతం చిత్రీకరణ పూర్తయిందన్నారు. ఫైట్‌మాస్టర్‌ వెంకట్‌ ఆధ్వర్యంలో సినిమాలో చివరి ఫైట్‌ను తంతడి-వాడపాలెం తీరంలో చిత్రీకరించారు. ఇందుకోసం ఫిరంగులు, పాత లారీలు, జీపులను రప్పించారు. తీరాన్ని ఆనుకొని కోట మాదిరిగా ఒక సెట్‌ ఏర్పాటు చేశారు. ఏప్రిల్‌ 5 వరకు ఇక్కడ చిత్రీకరణ ఉంటుందని, తరవాత విశాఖపట్నంలోని కైలాసగిరి వద్ద కొన్ని సన్నివేశాలు చిత్రీకరిస్తామని యూనిట్‌ వర్గాలు తెలిపాయి. బ్రిటిష్‌ వారి పాత్రలను పోషించడానికి విదేశాల నుంచి యువకులను షూటింగ్‌ నిమిత్తం ఇక్కడకు తీసుకొచ్చారు. ఈ సినిమాకి నవీన్‌ మేడారం దర్శకత్వం వహిస్తున్నారు.

తీరంలో ఏర్పాటుచేసిన సెట్‌