హాకీ క్రీడాకారులకు కొరవడిన వసతులు

నెహ్రూచౌక్‌ (అనకాపల్లి), న్యూస్‌టుడే: క్రీడాకారులకు మౌలిక సదుపాయాలు కల్పించేందుకు కేంద్రం నిధులు మంజూరు చేయాలని ఎంపీ భీశెట్టి వెంకటసత్యవతి కోరారు. పార్లమెంటు సమావేశాల్లో భాగంగా మంగళవారం జరిగిన సమావేశంలో ఎంపీ ఈ అంశాన్ని ప్రస్తావించారు. నియోజకవర్గ పరిధిలో ప్రతిభ ఉండి క్రీడా సదుపాయాలు లేక ఎంతో మంది గ్రామీణ క్రీడాకారులు ఇబ్బందులు పడుతున్నారని తెలిపారు. క్రీడాకారులకు మంచి శిక్షణ ఇచ్చేందుకు ఖేలో ఇండియా కార్యక్రమంలో భాగంగా నిధులు మంజూరు చేయాలని విజ్ఞప్తి చేశారు. ఎలమంచిలి హాకీ క్రీడాకారులకు సరైన క్రీడామైదానం, శిక్షణ కేంద్రం, మౌలిక సదుపాయాలు లేక క్రీడాకారులు శిక్షణకు ఇతర రాష్ట్రాలకు వెళ్లవలసిన పరిస్థితి నెలకొందన్నారు. హాకీలో జాతీయ, అంతర్జాతీయ స్థాయిలో రాణించేందుకు హాకీ స్టేడియం, శిక్షణకేంద్రం నిర్మాణానికి యువజన వ్యవహారాలు, క్రీడల మంత్రిత్వ శాఖ నిధులు మంజూరు చేయాలని ఆమె కోరారు.