అప్పన్న తిరు కల్యాణోత్సవం చూతము రారండి..

దర్శన వేళలు.. ఆర్జిత సేవల్లో మార్పులు

సింహాచలం, న్యూస్‌టుడే: సింహగిరిపై కొలువైన శ్రీవరాహలక్ష్మీ నృసింహ స్వామివారి వార్షిక తిరు కల్యాణ మహోత్సవాన్ని ఏప్రిల్‌ 2న అత్యంత వైభవోపేతంగా నిర్వహించనున్నట్లు దేవస్థానం ఈవో వి.త్రినాథరావు ఒక ప్రకటనలో తెలిపారు. ఏప్రిల్‌ 1 నుంచి 7వ తేదీ వరకు జరిగే కల్యాణోత్సవాలను పురస్కరించుకుని స్వామివారి దర్శనం వేళలు, ఆర్జిత సేవల్లో మార్పులు చోటు చేసుకుంటాయని తెలిపారు.

1న అంకురార్పణతో శ్రీకారం

ఏప్రిల్‌ 1న రాత్రి 7 గంటల నుంచి కల్యాణోత్సవాలకు అంకురార్పణతో శ్రీకారం చుడతారు. ఈ సందర్భంగా ఆ రోజు రాత్రి 7 గంటల తర్వాత భక్తులకు స్వామివారి దర్శనాలు లభించవని పేర్కొన్నారు. 2న రథోత్సవం, కల్యాణోత్సవం నిర్వహించనున్నందున మధ్యాహ్నం 2.30 గంటల నుంచి భక్తులకు స్వామివారి దర్శనాలు నిలిపివేస్తారు. మధ్యాహ్నం 3 గంటలకు కొట్నాల ఉత్సవం, సాయంత్రం 4 గంటల నుంచి ఆరాధన, విశేష హోమాలు, ధ్వజారోహణం, గ్రామ బలిహరణం జరుగుతాయి. రాత్రి 6.30 గంటల నుంచి ఎదురు సన్నాహోత్సవం, రాత్రి 8 గంటల నుంచి సింహగిరి మాడవీధుల్లో స్వామివారి రథోత్సవం నిర్వహిస్తారు. రాత్రి 9.30 గంటల నుంచి స్వామి, అమ్మవార్ల కల్యాణోత్సవం జరుగుతుంది. ఆరోజు ఈ రాత్రి 8.30 గంటల నుంచి 10 గంటల వరకు దర్శనాలు కల్పించనున్నారు. 3న స్వామివారి తిరువీధి సేవ, ఆరాధన, హోమాలు, గ్రామ బలిహరణం జరుగుతాయి. ఈ సందర్భంగా రాత్రి 7 గంటల నుంచి భక్తులకు దర్శనాలు లభించవు.

* 4న ఉదయం 7.30 గంటల నుంచి వైదిక సదస్యం నేపథ్యంలో భక్తులకు ఉదయం 8 గంటల నుంచి దర్శనాలు కల్పిస్తారు. సాయంత్రం 4 గంటల నుంచి పండిత సదస్యం, సర్వజన మనోరంజని వాహనంపై గ్రామ తిరువీధి, రాత్రి 7 గంటల నుంచి ఆరాధన, 10 గంటలకు నివేదన జరుగుతాయి. ఈ సందర్భంగా రాత్రి 7 గంటల తర్వాత భక్తులకు దర్శనాలు లభించవు.

* 5న సాయంత్రం 5 గంటల నుంచి సూర్యప్రభ వాహనంపై స్వామివారి గ్రామ తిరువీధి నిర్వహించనున్నందున ఆ రోజు రాత్రి 7 గంటల నుంచి భక్తులకు దర్శనాలు లభించవు.

* 6న ఉదయం 6.30 గంటలకు పూర్ణాహుతి, అనంతరం బాలభోగం, చూర్ణోత్సవం, వసంతోత్సవం, తిరువీధి, పవిత్ర గంగధారలో చక్రవారి అవబృదోత్సవం జరుగుతాయి. రాత్రి 7 గంటల నుంచి మృగయోత్సవంలో భాగంగా దొంగల దోపు ఉత్సవం, ధ్వజావరోహణము జరుగుతాయి. ఈ సందర్భంగా రాత్రి 7 గంటల తర్వాత భక్తులకు స్వామివారి దర్శనాలు లభించవు.

* 7న ఉదయం 8 గంటల నుంచి వినోదోత్సవం, ముత్యాల పల్లకీ సేవ, 11 గంటలకు మహా సంప్రోక్షణ జరుగుతాయి. ఈ సందర్భంగా ఆ రోజు ఉదయం 11 గంటల నుంచి మధ్యాహ్నం 2.30 గంటల వరకు భక్తులకు దర్శనాలు లభించవు. మళ్లీ సాయంత్రం 6 గంటల నుంచి భక్తులకు దర్శనాలు నిలిపివేస్తారు. రాత్రి ఆరాధన, శ్రీపుష్పయాగం, ద్వాదశారాధనలు, ఉయ్యాల సేవ, పవళింపు సేవ, ఏకాంత సేవతో వార్షిక కల్యాణోత్సవాలు పరిసమాప్తమవుతాయి.

* కల్యాణోత్సవాలను పురస్కరించుకుని ఏప్రిల్‌ 1వ తేదీ నుంచి 7వ తేదీ వరకు సుప్రభాత సేవ, ఉదయం, రాత్రి ఆరాధన టిక్కెట్లు రద్దు చేశారు. 1వ తేదీ నుంచి 16వ తేదీ వరకు ఆలయంలో జరిగే అన్ని ఆర్జిత సేవలు రద్దు చేశారు.