గంజాయి రవాణా నిరోధానికి నిఘా పెంపు

ఎ.కోడూరు పోలీస్‌స్టేషన్‌లో రికార్డులు పరిశీలిస్తున్న ఎస్పీ గౌతమి సాలి

కె.కోటపాడు, దేవరాపల్లి, న్యూస్‌టుడే: గంజాయి రవాణా నిరోధానికి గట్టి నిఘా పెట్టామని ఎస్పీ గౌతమి సాలి తెలిపారు. ఆమె బుధవారం ఎ.కోడూరు పోలీస్‌స్టేషన్‌ను సందర్శించి రికార్డులను పరిశీలించారు. ఈ సందర్భంగా  విలేకరులతో మాట్లాడుతూ ఎవరైనా గంజాయి అక్రమంగా తరలిస్తూ పట్టుబడితే కఠిన చర్యలు తప్పవన్నారు. జిల్లా వ్యాప్తంగా ఎక్కువగా ప్రమాదాలు జరుగుతున్న 37 ప్రాంతాలను గుర్తించామన్నారు. వీటి వద్ద ప్రమాదాలు నివారించేందుకు రెవెన్యూ సిబ్బంది సహకారాన్ని తీసుకుంటున్నామని చెప్పారు. నేరాల సంఖ్య తగ్గే విధంగా గ్రామాల్లో శాంతియుత వాతావరణాన్ని నెలకొల్పడానికి చర్యలు తీసుకోవాలని సూచించారు. సీఐ తాతారావు, ఎస్‌ఐ డి.నాగేంద్ర పాల్గొన్నారు.