అంతా.. రామ మయం!

న్యూస్‌టుడే, వన్‌టౌన్‌: విశాఖ జిల్లా అంతటా గురువారం శ్రీరామ నవమి పర్వదిన సందడి నెలకొంది. ఆలయాల్లో ప్రత్యేక పూజలు చేశారు. భక్తులు పెద్ద ఎత్తున తరలివచ్చారు. పలు ఆలయాల వద్ద భారీ వరసలు కనిపించాయి. సీతారాముల కల్యాణోత్సవాలను వైభవంగా నిర్వహించారు. ప్రముఖ ఆలయాల్లో ముత్యాల తలంబ్రాలతో ఈ క్రతువును కనువిందుగా చేశారు. కల్యాణ మహోత్సవాన్ని తిలకించిన భక్తజనం తన్మయత్వానికి లోనయ్యారు.

శ్రీరామ...జగదభిరామా...సీతారామా అంటూ స్వామి, అమ్మవార్ల నామస్మరణ కల్యాణ మండపాల వద్ద మార్మోగింది. నగరంలోని అంబికాబాగ్‌ రామాలయంలో జరిగిన కార్యక్రమంలో పాల్గొన్న భక్తులను, అలంకరించిన సీతారామలక్ష్మణుల విగ్రహాలను చిత్రాల్లో చూడొచ్చు.