ప్రమాదాలు జరుగుతున్నా పట్టదా?

జాతీయ రహదారిపై నిలిచిన లారీ

నక్కపల్లి, న్యూస్‌టుడే: జాతీయ రహదారిపై ఆగి ఉన్న వాహనాలు ప్రాణాంతకంగా మారుతున్నాయి. పాయకరావుపేట మండలం సీతారాంపురం వద్ద బుధవారం తెల్లవారుజామున ఆగి ఉన్న లారీని కారు ఢీకొట్టడంతో ఇద్దరు మృత్యువాత పడ్డారు. ఇలాంటి ఘటనలు జిల్లా పరిధిలో తరచూ చోటుచేసుకుంటున్నాయి. జాతీయ రహదారి నిర్వహణ గుత్తేదారులు, పోలీసుల గస్తీ ఉంటున్నా, ప్రమాదాల నియంత్రణ అనుకున్నస్థాయిలో జరగడంలేదు. రాయి లోడుతో వెళుతున్న ఓ లారీ నక్కపల్లిలో మరమ్మతుల కారణంగా నిలిచిపోయింది. రాత్రి వేళల్లో ఇదే మార్గంలో వచ్చిన పలు వాహనాలు దగ్గరకు వచ్చేవరకూ దీన్ని గుర్తించలేకపోయారు. చాలామంది ప్రమాదం నుంచి త్రుటిలో బయటపడ్డారు. ఇలాంటి వాటిని ఎప్పటికప్పుడు పక్కకు తప్పిస్తేనే ప్రజల ప్రాణాలకు రక్షణ ఉంటుంది. ఈ దిశగా అధికారులు దృష్టి సారించి చర్యలు చేపట్టాలని వాహనదారులు కోరుతున్నారు.