నేలకొరిగిన చెట్లు.. నిలిచిన విద్యుత్తు సరఫరా

తిమ్మరాజుపేటలో రోడ్డుకు అడ్డంగా కూలిన కొబ్బరి చెట్టు

ఎలమంచిలి, కశింకోట, న్యూస్‌టుడే: ఎలమంచిలి, కశింకోట మండలాల్లో మంగళవారం రాత్రి ఈదురు గాలులు బీభత్సం సృష్టించాయి. భారీగాలులతో కూడిన వర్షం కారణంగా పలుచోట్ల చెట్లు నేలకొరిగాయి. విద్యుత్తు సరఫరా నిలిచిపోయింది. పలుచోట్ల పిడుగులు పడ్డాయి. వాహనాల రాకపోకలకు అంతరాయం ఏర్పడింది. ఎలమంచిలి తులసీనగర్‌లో రెండు విద్యుత్తు స్తంభాలు కూలిపోయాయి. విద్యుత్తు సరఫరా నిలిచిపోవడంతో పట్టణం అంతా అంధకారంగా మారింది. పిడుగుపాటుతో పలుచోట్ల టీవీలు, గృహోపకరణాలు దెబ్బతిన్నాయి. మామిడి పంటకు అపారనష్టం జరిగింది. కశింకోట మండలం నూతనగుంటపాలెం, అచ్యుతాపురం, త్రిపురవానిపాలెం, గొబ్బూరు, నర్సింగబిల్లి తదితర గ్రామాల్లో వడగళ్లతో వర్షం కురిసింది. గాలుల ధాటికి జాతీయ రహదారిపై వెళ్లే వాహనదారులు వాహనాలు ఆపి సమీపంలోని దుకాణాల వద్దకు పరుగులు తీశారు. విద్యుత్తు తీగలు తెగిపడటంతో నర్సింగబిల్లి ఉపకేంద్రం పరిధిలోని గ్రామాల్లో అంధకారం అలుముకుంది.

అచ్యుతాపురం, రాంబిల్లి: రాంబిల్లి మండలం పలుచోట్ల చెట్లుపడి విద్యుత్తు తీగలు తెగిపోయాయి. రాంబిల్లి విద్యుత్తు ఉపకేంద్రం పరిధిలోని కొత్తపేట, లాలంకోడూరు ఫీడర్ల పరిధిలో సరఫరాకు ఇబ్బందులు తలెత్తాయి. అచ్యుతాపురం మండలం తిమ్మరాజుపేటలో కొబ్బరి చెట్లు నేలకూలాయి. ఆంజనేయుని ఆలయం వద్ద రోడ్డుమీద చెట్టు కూలడంతో రాకపోకలకు ఇబ్బంది తలెత్తింది.