యువకుడికి దేహశుద్ధి

గోపాలపట్నం, న్యూస్‌టుడే : మహిళ మెడలో గొలుసు లాక్కుని పరారైన వ్యక్తిని స్థానికులు పట్టుకుని దేహశుద్ధి చేసి, పోలీసులకు అప్పగించిన ఘటన శనివారం సాయంత్రం గోపాలపట్నంలో చోటు చేసుకుంది. ఆ వివరాలు... 89వ వార్డు చంద్రనగర్‌కు చెందిన టి.చిన్ని(40)అనే మహిళ సింహాచలం రైల్వేస్టేషన్‌ ఫుట్‌ఓవర్‌ బ్రిడ్జిపై నడుచుకుంటూ వెళ్తున్నారు. అప్పటికే మాటు వేసి ఉన్న దినేష్‌(29) ఆమె మెడలో బంగారు నల్లపూసల తాడు లాక్కుని పాతగోపాలపట్నం వైపు పరారయ్యాడు. దీంతో ఆమె గట్టిగా కేకలు వేయడంతో స్థానికులు వెంబడించి పట్టుకున్నారు. గొలుసు స్వాధీనం చేసుకుని, దేహశుద్ధి చేసి పోలీసులకు అప్పగించారు. ప్రహ్లాదపురానికి చెందిన నిందితుడు ఓ వస్త్రదుకాణంలో పని చేస్తున్నాడు. క్రైం ఎస్సై నరసింగరాజు ఆధ్వర్యంలో కేసు నమోదు చేసి దర్యాప్తు చేస్తున్నారు.