ఉత్తమ ఏరువాక కేంద్రంగా గుర్తింపు

అవార్డు అందుకుంటున్న ఏరువాక కేంద్రం సమన్వయకర్త లక్ష్మణ్‌

కలెక్టరేట్‌/వ్యవసాయ విభాగం, న్యూస్‌టుడే: విజయనగరం ఏరువాక కేంద్రం వరుసగా రెండో ఏడాది ఉత్తమ కేంద్రంగా రాష్ట్రస్థాయి అవార్డుకు ఎంపికైంది. రైతులకు క్షేత్రస్థాయిలో సలహాలు, సూచనలు అందిస్తూ.. సకాలంలో వ్యవసాయ, సాగు సమాచారం చేరవేయడం.. విపత్తులు ఏర్పడినప్పుడు తగిన తోడ్పాటు, అధునాతన సాంకేతిక పరిజ్ఞానాన్ని అందించడం.. తదితర అంశాల్లో చేస్తున్న కృషికి గుర్తింపు దక్కింది. చిరుధాన్యాలపై పరిశోధనలు, సాగు విస్తీర్ణం పెంపు, గిరిజన ఉపప్రణాళిక ద్వారా సాంకేతిక పరిజ్ఞానాన్ని అందించడంలో తోడ్పాటును అందించినందుకు గాజులరేగ వ్యవసాయ పరిశోధన స్థానం సైతం రాష్ట్రస్థాయిలో ఉత్తమ పరిశోధన స్థానంగా వరుసగా రెండోసారి అవార్డు దక్కించుకుంది. శుక్రవారం గుంటూరులోని ఆచార్య ఎన్జీ రంగా వ్యవసాయ విశ్వవిద్యాలయంలో జరిగిన సమావేశంలో ఏరువాక కేంద్రం సమన్వయకర్త కెల్ల లక్ష్మణ్‌, వ్యవసాయ పరిశోధన స్థానం సీనియర్‌ శాస్త్రవేత్త పాత్రో అవార్డులు అందుకున్నారు.