ఇకనైనా.. అభివృద్ధి జరిగేనా?

విజయనగరం అర్బన్‌, న్యూస్‌టుడే: పంచాయతీలకు అందిన ప్రోత్సాహక నిధులతో గ్రామాల్లో అభివృద్ధికి అడుగులు పడనున్నాయి. గతేడాది జరిగిన స్థానిక ఎన్నికల్లో జిల్లాలో 146 పంచాయతీలు ఏకగ్రీవం కాగా.. వీటికి జనాభా ప్రాతిపదికన రూ.8.75 కోట్లు విడుదలయ్యాయి. ఈ మొత్తాన్ని ఆయా పంచాయతీల సాధారణ నిధులకు రెండు రోజుల్లో జమచేయనున్నారు. ఈ మేరకు ఖజానా అధికారులకు జిల్లా పంచాయతీ అధికారులు ఆదేశాలు జారీ చేశారు.

సాధారణ నిబంధనలే..

సాధారణ నిధులకు వర్తించే నిబంధనలే వీటికీ వర్తిస్తాయి. గతంలో రోడ్లు, కల్వర్టులకు ఈ సొమ్మును ఉపయోగించేలా మార్గదర్శకాలున్నాయి. అయితే తాజాగా ఎలాంటి విధివిధానాలనూ ఖరారు చేయలేదు. దీంతో తమ ప్రాంతాలకు అవసరమైన పనులు చేసుకోవచ్చని సర్పంచులు భావిస్తున్నారు. ఇప్పటికే ఆర్థిక సంఘం నిధులు వెనక్కి వెళ్లిపోవడం, సాధారణ నిధులు పెద్దగా లేకపోవడంతో.. పంచాయతీలను ఈ డబ్బులు ఆదుకోనున్నాయి.

వీటికి అవకాశం లేదు..

చాలాచోట్ల హరిత రాయబారులకు జీతాలు చెల్లించాల్సి ఉంది. అలాగే కొన్ని ప్రాంతాల్లో అద్దెలు, విద్యుత్తు బిల్లుల సమస్యలున్నాయి. అయితే ఈ నిధులను అలాంటి వాటికి ఖర్చుచేసేందుకు అవకాశం లేదని, ఉపాది పథకంలో వీటికి నిధులు కేటాయించేందుకు ప్రతిపాదించినట్లు డీపీవో సుభాషిణి చెప్పారు.

జనాభా ఏకగ్రీవ పంచాయతీలు నిధులు (రూ.కోట్లలో)

2000 లోపు 120 6.00

2001-5000 23 2.30

5001-10,000 03 0.45