ఇద్దరు బాల నేరస్థులు అరెస్టు

రింగురోడ్డు: నగరంలో ఈనెల 19వ తేదీన తెల్లవారుజామున డి.కిరణ్‌ కుమార్‌ ఇంట్లో దొంగతనానికి పాల్పడిన ఇద్దరు బాల నేరస్థులను రెండో పట్టణ పోలీసులు శనివారం ఉదయం అంబటిసత్రం కూడలివద్ద అదుపులోకి తీసుకున్నారు. వీరి వద్ద నుంచి 12 తులాల బంగారు ఆభరణాలను స్వాధీనం చేసుకున్నారు. ఈ మేరకు వివరాలను అదనపు ఎస్పీ అనిల్‌ కుమార్‌ విలేకరుల సమావేశంలో వెల్లడించారు. నగరపాలక సంస్థలో వాహన ఛోదకుడిగా పనిచేస్తున్న డి.కిరణ్‌ కుమార్‌ ఇచ్చిన ఫిర్యాదు మేరకు పోలీసులు దర్యాప్తు చేపట్టినట్లు తెలిపారు. పట్టుబడిన వారిలో ఒకరు నగరానికి చెందిన 17ఏళ్ల బాలుడు కాగా, మరొకరు కాకినాడ ప్రాంతానికి చెందిన మైనర్‌గా అదనపు ఎస్పీ తెలిపారు. ఇద్దరూ పాత నేరస్థులే అని.. జువైనల్‌ హోమ్‌లో కలిసి పెరిగినట్లు వివరించారు. సమావేశంలో సీఐ లక్ష్మణరావు, ఎస్సై సాగర్‌ బాబు తదితరులు పాల్గొన్నారు.