మ్యుటేషన్ల వివరాలు సమర్పించాలని ఆదేశాలు

శృంగవరపుకోట, న్యూస్‌టుడే: విజయనగరం రెవెన్యూ డివిజన్‌ పరిధిలోని అన్ని మండలాల్లో 2020 ఆగస్టు 1 నుంచి ఈ ఏడాది మే నెల వరకు జరిగిన మ్యుటేషన్ల వివరాలను రెండు రోజుల్లో అందించాలని తహసీల్దార్లను ఆర్డీవో భవానీశంకర్‌ ఆదేశించారు. మండలాల్లో అన్‌ రిజిస్టర్డ్‌ పార్టీషియన్‌ డీడ్లతో అక్రమంగా మ్యుటేషన్లు చేస్తున్న వైనంపై బుధవారం ‘ఈనాడు’లో ‘దొడ్డిదారిన మ్యుటేషన్లు’ శీర్షికతో ప్రచురితమైన కథనంపై ఆయన స్పందించారు. ప్రాంతీయ విజిలెన్సు, ఎన్‌ఫోర్సుమెంటు అధికారి కోరిన వివరాలు అందించాలని రెవెన్యూ అధికారులకు సూచించారు. దాదాపు రెండేళ్ల కాలంలో జరిగిన మ్యుటేషన్లు, అందులో రిజిస్టర్డు డీడ్‌లు, అన్‌ రిజిస్టర్డు డీడ్‌ల వివరాలు, విస్తీర్ణం, ఐడీలు, దరఖాస్తు చేసిన తేదీలు తదితరాలను సమగ్రంగా అందించాలన్నారు.

కార్యాలయాల్లో గందరగోళం: ఆర్డీవో ఆదేశాలతో తహసీల్దారు కార్యాలయాల్లో గందరగోళం ఏర్పడింది. ముఖ్యంగా 2020 నుంచి ఏడాదిన్నర పాటు (కరోనా సమయంలో) ఇష్టారాజ్యంగా మ్యుటేషన్లు జరిగాయి. ఇప్పుడు వీటిపై పరిశీలన జరిగితే గుట్టురట్టవుతుందని రెవెన్యూ వర్గాలు ఆందోళన చెందుతున్నాయి. కొన్నిచోట్ల అన్‌రిజిస్టర్డు పార్టీషియన్‌ డీడ్‌ల్లో వారసుల సంతకాలు చేసినట్లు సమాచారం. ఈ వివరాలన్నీ ఉన్నతాధికారులకు అందితే పెద్దఎత్తున అక్రమాలు బయటపడే అవకాశముంది.