రైల్వేలైను వద్దు.. భూములు తీసుకోవద్దు

జామి తహసీల్దారు కార్యాలయం వద్ద నినాదాలు చేస్తున్న రైతులు

జామి, న్యూస్‌టుడే: విశాఖ-రాయపూర్‌ మార్గంలో మూడో రైల్వేలైను నిర్మాణానికి జామి ప్రాంతంలో భూములను సేకరించొద్దని, వెంటనే సర్వేను నిలిపివేయాలంటూ బాధితులు ఆందోళనకు దిగారు. సోమవారం జడ్పీటీసీ మాజీ సభ్యుడు బండారు పెదబాబు ఆధ్వర్యంలో రైతులు తహసీల్దారు కార్యాలయం వద్దకు చేరుకొని ధర్నా చేశారు. ప్రస్తుతం సర్వే చేస్తున్న భూములన్నీ సన్న చిన్నకారు రైతులవని, వీటిని తీసుకుంటే జీవనోపాధి కోల్పోతామని ఆవేదన వ్యక్తం చేశారు. రైల్వే లైను వద్దు.. భూములు ఇచ్చేది లేదంటూ నినాదాలు చేశారు. అనంతరం ఉప  తహసీల్దారు సునీతకు వినతిపత్రం అందజేశారు.