ఆరికతోటలో దారుణ హత్య

పాత కక్షలే కారణమంటున్న పోలీసులు

రామభద్రపురం, బొబ్బిలి, న్యూస్‌టుడే: రామభద్రపురం మండలం ఆరికతోటలో పాతకక్షలు ఒకర్ని బలిగొన్నాయి. సీఐ శోభనబాబు, ఎస్‌ఐ కృష్ణమూర్తి వివరాల ప్రకారం.. గ్రామానికి చెందిన వర్రి చిన్నోడు (57) శుక్రవారం సాయంత్రం ఎప్పటిలాగే వ్యవసాయ పనులు ముగించుకుని ఇంటికి చేరుకున్నాడు. చిమ్మచీకటి, చిరుజల్లులు.. ఆపై విద్యుత్తు సరఫరా లేని సమయంలో సమీపంలోని దుకాణానికి రోడ్డుపై నడిచి వెళ్తుండగా దుండగులు ఇనుప రాడ్లు, కత్తులతో తలపై బలంగా కొట్టడంతో అక్కడికక్కడే మృతి చెందాడు. గత వినాయక చవితి సమయంలో చిన్నోడికి, కొంతమందికి మధ్య గొడవ జరిగి కేసు నమోదైంది. అప్పటి నుంచి వారి మధ్య పాత కక్షలు నడుస్తూనే ఉన్నాయి. హత్యలో ఆయా వ్యక్తుల పాత్ర ఉంటుందని, పథకం ప్రకారం చేసుంటారని పోలీసులు అనుమానిస్తున్నారు. వర్రి చిన్నోడికి భార్య సత్తెమ్మ, కుమారులు అప్పన్న, శివుడు, కుమార్తెలు పార్వతి, గౌరి ఉన్నారు. పోలీసులు ఘటనా స్థలానికి చేరుకుని దర్యాప్తు నిర్వహిస్తున్నారు. ఇక మాకెవరు దిక్కంటూ కుటుంబ సభ్యులు విలపిస్తున్నారు.