మెంటాడకు ఆండ్ర ఠాణా తరలింపు: ఎస్పీ

మెంటాడ, న్యూస్‌టుడే: ఆండ్ర పోలీస్‌స్టేషన్‌ను మెంటాడకు తరలించాలని పలువురి నుంచి ప్రతిపాదనలు రావడంతో ఏర్పాట్లు చేస్తున్నట్లు ఎస్పీ దీపిక ఎం.పాటిల్‌ పేర్కొన్నారు. శనివారం ఆండ్ర స్టేషన్‌ను పరిశీలించిన ఆమె వివరాలు వెల్లడించారు. మెంటాడలో ఠాణా ఏర్పాటుకు అవసరమైన భవనం కేటాయిస్తే ఉన్నతాధికారులకు ప్రతిపాదనలు పంపించి చర్యలు తీసుకుంటామన్నారు. గతేడాది మెంటాడ మీదుగా గంజాయి అక్రమ రవాణా ఎక్కువగా జరిగేదని, పిట్టాడ వద్ద చెక్‌పోస్టు ఏర్పాటు చేసి నియంత్రించామన్నారు. ఈ ప్రాంతంలో అదనంగా చెక్‌పోస్టులు ఏర్పాటు చేసి విస్తృతంగా తనిఖీలు చేస్తామన్నారు. ఆపదలో ఉన్న వారి కోసం ప్రవేశపెట్టిన ‘దిశ’ యాప్‌ను కొందరు దుర్వినియోగం చేస్తున్నారని తెలిపారు. బొబ్బిలి డీఎస్పీ మోహనరావు, ఆండ్ర ఎస్సై సిద్ధార్థకుమార్‌ ఉన్నారు.