అనిశాకు చిక్కిన జేఈ

ధనుంజయరావు

విజయనగరం నేర వార్తవిభాగం, న్యూస్‌టుడే: దత్తిరాజేరు మండలంలోని గ్రామీణ తాగునీటి సరఫరా విభాగంలో విధులు నిర్వహిస్తున్న జేఈ ధనుంజయరావు మంగళవారం రాత్రి లంచం తీసుకుంటుండగా  అనిశాకు దొరికిపోయారు. గతంలో ఆయన బొండపల్లి మండలంలో పనిచేసినప్పుడు ఎం.బుక్‌ కోసం సర్పంచి కర్రోతు శ్రీనివాసరావుకు రూ.20 వేలు లంచమివ్వాలని డిమాండు చేశారు. దీంతో అనిశా అధికారులను సర్పంచి ఆశ్రయించారు. విజయనగరంలోని ఉడాకాలనీలోని జేఈ ఉంటున్న సెల్లార్‌లో సర్పంచి నుంచి డబ్బులు తీసుకుంటుండగా వలపన్ని జేఈని పట్టుకున్నారు. నగదును స్వాధీనం చేసుకొని ఆయన్ని అరెస్టు చేసినట్లు అనిశా డీఎస్పీ రామచంద్రరావు తెలిపారు. కాగా దత్తిరాజేరులో ఉదయం మండల సమావేశానికి జేఈ హాజరయ్యారు. ఈ దాడిలో సీఐలు మహేష్‌, రమణ, సిబ్బంది పాల్గొన్నారు.