‘నా అభిప్రాయం తీసుకుంటే బాగుండేది’

మాట్లాడుతున్న నారాయణస్వామినాయుడు

పూసపాటిరేగ, న్యూస్‌టుడే: తెదేపా నెల్లిమర్ల నియోజకవర్గ ఇన్‌ఛార్జిగా కర్రోతు బంగార్రాజును నియమించడంపై మాజీ మంత్రి పతివాడ నారాయణస్వామినాయుడు అసంతృప్తి వ్యక్తం చేశారు. శనివారం తన స్వగ్రామమైన  చల్లవానితోటలో ఆయన విలేకరులతో మాట్లాడారు. ఇన్‌ఛార్జి ఎంపిక విషయంలో తన అభిప్రాయం తీసుకొని ఉంటే బాగుండేదన్నారు. 40 ఏళ్లుగా పార్టీకి ఎంతో కృషి చేశానని, ఏడుసార్లు ఎమ్మెల్యేగా పనిచేసిన అనుభవం ఉందని, సీనియర్‌ నాయకుడిగా గౌరవం ఇవ్వకపోవడంతో తీవ్ర మనస్తాపానికి గురయ్యానని తెలిపారు. పార్టీ కార్యక్రమాలపై కొద్ది రోజుల్లో కార్యకర్తలు, అభిమానులతో చర్చించి ముందుకు వెళ్తామన్నారు. పార్టీ రాష్ట్ర కార్యనిర్వాహక కార్యదర్శి మహంతి చిన్నంనాయుడు, పూసపాటిరేగ, డెంకాడ జడ్పీటీసీ మాజీ సభ్యులు అకిరి ప్రసాదరావు, పతివాడ అప్పలనరసయ్య, మండల అధ్యక్షుడు గౌరీశంకర్రావు, నాయకులు పి.తమ్మినాయుడు, పద్మ, అప్పలనాయుడు తదితరులు పాల్గొన్నారు.