26 నుంచి చీపురుపల్లి కనకమహాలక్ష్మి జాతర

చీపురుపల్లి, న్యూస్‌టుడే: ఉత్తరాంధ్ర ప్రాంత ఆరాధ్య దైవం చీపురుపల్లి కనకమహాలక్ష్మి అమ్మవారి 25వ జాతర మహోత్సవాలను ఈనెల 26 నుంచి మూడు రోజులపాటు భారీగా నిర్వహించనున్నట్లు జడ్పీ ఛైర్మన్‌ మజ్జి శ్రీనివాసరావు, ఎంపీ బెల్లాన చంద్రశేఖర్‌, ఆలయ కమిటీ ఛైర్మన్‌ ఇప్పిలి సూర్యప్రకాశరావు తెలిపారు. దేవస్థానంలో పాలకవర్గ సభ్యులు, ప్రజాప్రతినిధుల సమావేశాన్ని శనివారం నిర్వహించారు. దీనిపై వారు మాట్లాడుతూ ఏటా శివరాత్రి తరువాత వచ్చే ఆదివారం నుంచి జాతర జరపడం ఆనవాయితీ అయినా ఈసారి వారం ఆలస్యమవుతుందని తెలిపారు. ఆదివారం అమావాస్య కావడంతో సంప్రదాయం ప్రకారం తదుపరి వారం నిర్వహించాలని నిర్ణయించామన్నారు. భక్తులకు ఇబ్బందులు తలెత్తకుండా తీసుకోవాల్సిన చర్యలు, సాంస్కృతిక కార్యక్రమాలపై చర్చించారు. కార్యక్రమంలో సీఐ జి.సంజీవిరావు, ఎస్‌ఐ ఎ.సన్యాసినాయుడు, కమిటీ వైస్‌ ఛైర్మన్‌ ఎస్వీ కుమారస్వామి, దేవస్థానం ఈవో జి.శ్రీనివాస్‌, వైకాపా నాయకులు కేవీ సూర్యనారాయణరాజు, ఇప్పిలి అనంతం, వలిరెడ్డి శ్రీనివాసనాయుడు, దన్నాన జనార్దనరావు తదితరులు పాల్గొన్నారు.