కలెక్టరేట్‌ను ముట్టడించిన అంగన్వాడీ కార్యకర్తలు

విజయనగరం కలెక్టరేట్‌: తమ డిమాండ్ల పరిష్కారం కోరుతూ  సీఐటీయూ ఆధ్వర్యంలో  అంగన్వాడీ కార్యకర్తలు, సహాయకులు సోమవారం విజయనగరం కలెక్టరేట్‌ను  ముట్టడించారు. సమస్యలు పరిష్కరించాలని పెద్ద ఎత్తున నినాదాలు చేశారు. కనీస వేతనం రూ.26 వేలు చెల్లించాలని, సుప్రీంకోర్టు తీర్పు ప్రకారం గ్రాట్యుటీ, ఉద్యోగ విరమణ ప్రయోజనాలు రూ.5 లక్షలు,  వేతనంలో సగం పింఛన్లు ఇవ్వాలని కోరారు. అంగన్వాడీలకు ఫేస్‌ యాప్‌ హాజరు విధానాన్ని రద్దు చేయాలని , పర్యవేక్షణ పేరుతో వేధింపులు ఆపాలని, సూపర్‌వైజర్‌ పోస్టులకు వయో పరిమితి తొలగించాలని డిమాండ్‌ చేశారు. ఈ ఆందోళనలో సీఐటీయూ జిల్లా ప్రధాన కార్యదర్శి కె.సురేష్‌, అంగన్వాడీ వర్కర్స్‌ యూనియన్‌ జిల్లా అధ్యక్ష, కార్యదర్శులు బి.పైడిరాజు, ఎస్‌.అనసూయ,  గౌరవాధ్యక్షురాలు వి.లక్ష్మి, అధిక సంఖ్యలో అంగన్వాడీ కార్యకర్తలు, సహాయకులు పాల్గొన్నారు.