ఉద్యోగాల కల్పనలో ప్రభుత్వం విఫలం: కిమిడి

మాట్లాడుతున్న నాగార్జున

విజయనగరం అర్బన్‌, న్యూస్‌టుడే: రాష్ట్రంలో యువత నిరుద్యోగంతో సతమతమవుతోందని తెదేపా పార్లమెంటరీ అధ్యక్షుడు కిమిడి నాగార్జున పేర్కొన్నారు. నిరుద్యోగుల విషయంలో ప్రభుత్వానికి చిత్తశుద్ధి లేదన్నారు. శనివారం అశోక్‌ బంగ్లాలో విలేకర్లతో మాట్లాడారు. ఉద్యోగాల కల్పనలో ప్రభుత్వం విఫలమైందని విమర్శించారు. రాష్ట్రానికి భారీ ప్రాజెక్టులు, పెట్టుబడులు రాకపోవడంతో యువతకు ఉపాధి లేకుండా పోయిందన్నారు. పారిశ్రామికవేత్తలు ముందుకొచ్చినా ప్రోత్సాహం లేకపోవడంతో వెనుదిరుగుతున్నారని ఆరోపించారు. ఫెర్రో అల్లాయిస్‌ పరిశ్రమలకు విద్యుత్తు ఛార్జీల పెంపుతో జిల్లాలో రోజుకు రూ.22 లక్షల అదనపు భారం పడుతోందన్నారు. సమావేశంలో నాయకులు ప్రసాదుల వరప్రసాద్‌, కంది మురళీనాయుడు, వేచలపు శ్రీనివాసరావు, ముద్దాడ చంద్రశేఖర్‌, కోండ్రు శ్రీనివాసరావు పాల్గొన్నారు.