ఎన్టీఆర్‌ దేవుడిలా ఉండేవారు: బేబినాయన

బొబ్బిలి, న్యూస్‌టుడే: ఎన్టీఆర్‌ శతజయంతి ఉత్సవాలను పురస్కరించుకుని ఆయన వీరాభిమానులను బొబ్బిలి కోటలో గురువారం తెదేపా నియోజకవర్గ ఇన్‌ఛార్జి బేబినాయన సత్కరించారు. అంతకుముందు ఎన్టీఆర్‌ విగ్రహానికి పూలమాల వేసి నివాళులు అర్పించారు. ఈ సందర్భంగా ఆయన మాట్లాడుతూ.. తన చిన్నతనంలో ఎన్టీఆర్‌ సినిమాలు ఎక్కువగా చూసేవాడినని, ఆయన వేసిన పాత్రలు చూసి నివ్వెరపోయేవారమన్నారు. దేవుళ్లు ఎలా ఉంటారో తెలియదుకానీ ఆ పాత్రలు చూసి దేవుళ్లు ఇలా ఉండేవారేమోనని అనుకునేవాడినని తన అభిమానాన్ని చాటుకున్నారు. ఎన్టీఆర్‌ అభిమాన సంఘ నాయకుడు కనకమహేశ్‌ పట్నాయక్‌, తెదేపా పట్టణాధ్యక్షుడు శరత్‌ తదితరులు పాల్గొన్నారు.