విదేశాల్లోనూ పార్వతీపురం గళం

ఈనాడు, విజయనగరం: తెలుగునాట పౌరాణిక పాత్రలకు పెట్టింది పేరు బుర్రా సుబ్రహ్మణ్యశాస్త్రి. ఆయన తరువాత ఆ స్థాయిలో గుర్తింపు పొందారు మన్యం జిల్లాకు చెందిన గంటా మంగాదేవి. రంగస్థలంలో కొన్ని పాత్రలు పురుషులకే పరిమితం కాదని నిరూపిస్తూ.. హరిశ్చంద్రుడిగా, అర్జునుడిగా తన నటనతో అందరినీ మెప్పిస్తున్నారు. ఈ నేపథ్యంలో గతనెలలో ఉత్తర అమెరికా తెలుగు సంఘం ఆహ్వానంపై అమెరికాలో పది రోజులు పర్యటించి అట్లాంటా.. న్యూజెర్సీల్లో మూడు చోట్ల ప్రదర్శనలిచ్చారు. ప్రముఖుల ప్రశంసలు అందుకున్నారు. ఇటీవల ఎన్టీఆర్‌ శతజయంతి ఉత్సవాల సందర్భంగా న్యూజెర్సీలో ప్రదర్శనలిచ్చారు. బుధవారం రాత్రి తిరిగొచ్చామని, ఈ పర్యటన ఎంతో ఆనందాన్ని ఇచ్చిందని మంగాదేవి ‘ఈనాడు’తో అన్నారు. ఈ కార్యక్రమానికి ఉత్తరాంధ్ర నుంచి హాజరైన పది మంది కళాకారుల్లో తానొకరినని చెప్పారు.