అద్దె భవనాల్లోనే అంగన్‌వాడీలు

సాలూరు గ్రామీణం, న్యూస్‌టుడే: కొఠియా వివాదాస్పద గ్రామాల్లోని శిఖరాగ్రాన ఉన్న పగులుచెన్నూరు, పట్టుచెన్నూరులో పది అంగన్‌వాడీ కేంద్రాలు రాష్ట్ర ప్రభుత్వ ఆధ్వర్యంలో ఉన్నాయి. దాదాపు అదే సంఖ్యలో ఒడిశా ప్రభుత్వం కూడా కేంద్రాలను నిర్వహిస్తోంది. ఆంధ్రాకున్న అన్ని కేంద్రాలు అద్దెళ్లల్లో కొనసాగుతుండగా.. ఒడిశాకు అధికంగా సొంత భవనాలున్నాయి. తాజాగా ఎగువమెండంగిలో నూతన భవనాన్ని నిర్మిస్తున్నారు. గతేడాది అప్పటి పీవో కూర్మనాథ్‌ స్వయంగా ఆయా గ్రామాల్లో పర్యటించి నిర్మాణాలు చేపట్టాలని స్థానికులను కోరారు. పట్టుచెన్నూరులో పునాదుల కోసం గోతులు తీసినా పనులు ముందుకు సాగలేదు. పగులుచెన్నూరులో స్లాబ్‌దశకు వచ్చినా ఇప్పటి వరకూ బిల్లు ఇవ్వలేదు. ఎగువ గంజాయిభద్ర, కోనధార తదితర ప్రాంతాల్లోనూ ఇదే పరిస్థితి ఉంది. దీనిపై ఐటీడీఏ ఏఈ సంతోష్‌ మాట్లాడుతూ పగులుచెన్నూరులో నిర్మాణానికి బిల్లు పెట్టామని, రావాల్సి ఉందని చెప్పారు. మిగిలిన చోట్ల నిర్మాణాలకు చర్యలు తీసుకుంటామన్నారు.