వైభవంగా వేణుగోపాలస్వామి విగ్రహ ప్రతిష్ఠోత్సవాలు

గరివిడి, న్యూస్‌టుడే: గరివిడి బంగారమ్మ కాలనీలో బమ్మిడి అప్పలస్వామి, కృష్ణమ్మ దంపతుల ఆధ్వర్యంలో దాతల సహకారంతో సుమారు రూ.2 కోట్లతో నూతనంగా నిర్మించిన  వేణుగోపాలస్వామి, గోదాదేవి, భగవద్రామానుజాచార్యుల ఆలయంలో విగ్రహ ప్రతిష్ఠా మహోత్సవాలు వైభవంగా జరుగుతున్నాయి. శుక్రవారం వేదగురువు త్రిదండి శ్రీమన్నారాయణ రామానుజ చిన్నజీయర్‌స్వామి ప్రత్యేక పూజలు చేశారు. విద్యాశాఖ మంత్రి బొత్స సత్యనారాయణ, మాజీ ఎంపీ బొత్స ఝాన్సీలక్ష్మి, ఎంపీ బెల్లాన చంద్రశేఖర్‌ పూజల్లో పాల్గొన్నారు. బొత్స దంపతులు చిన్నజీయర్‌ స్వామికి చిత్రపటాన్ని బహూకరించారు. భక్తులు పెద్ద ఎత్తున తరలిరావడంతో ఆధ్యాత్మిక సందడి నెలకొంది. అన్నసమారాధన ఏర్పాటు చేశారు. శనివారం ఉదయం ఎనిమిది గంటలకు విగ్రహ ప్రతిష్ఠ, పూర్ణాహుతితో ప్రతిష్ఠ కార్యక్రమం ముగుస్తుందని ఆలయ ధర్మకర్త అప్పలస్వామి తెలిపారు.