TS News: వరంగల్‌ జిల్లాలో ‘ఆంత్రాక్స్‌’ కలకలం

దుగ్గొండి: వరంగల్‌ జిల్లా దుగ్గొండి మండలంలో ‘ఆంత్రాక్స్‌’ కలకలం రేగింది. మండలంలోని చాపలబండ గ్రామంలో గొర్రెలకు ఆంత్రాక్స్‌ వ్యాధి సోకినట్లు పశువైద్యాధికారులు నిర్ధారించారు. వివరాల్లోకి వెళితే... గ్రామానికి చెందిన గజ్జెల సాంబయ్య గొర్రెల మందలో గత నాలుగు రోజులుగా రోజుకో గొర్రె చొప్పున మృతి చెందుతోంది. ఈ విషయమై సాంబయ్య పశువైద్యాధికారులను సంప్రదించగా మృతి చెందిన గొర్రెను ల్యాబ్‌కు పంపాలని సూచించారు. ఈ క్రమంలోనే సోమవారం మృతి చెందిన ఓ గొర్రెను ల్యాబ్‌కు తీసుకెళ్లగా పరీక్షలు చేసిన అధికారులు ఆంత్రాక్స్‌ వ్యాధి సోకినట్లు నిర్ధారించారు. మంగళవారం ఉదయం జేడీ బాలకృష్ణ గ్రామాన్ని సందర్శించి వ్యాధి నివారణకు తీసుకోవాల్సిన జాగ్రత్తలపై గొర్రెల కాపరులకు పలు సూచనలు, సలహాలు ఇచ్చారు.