రూ.60 లక్షలతో వ్యాపారి పరారీ?

ఎల్కతుర్తి, న్యూస్‌టుడే: హనుమకొండ జిల్లా ఎల్కతుర్తిలో ఓ ఎరువుల వ్యాపారి రూ.60 లక్షలతో పరారు కావడం చర్చనీయాంశంగా మారింది. భీమదేవరపల్లి మండలానికి చెందిన సదరు వ్యాపారి ఎల్కతుర్తిలో పదేళ్లుగా దుకాణం నిర్వహిస్తున్నారు. పలువురు రైతులు ఈయనే వద్దనే ఎరువులు, పురుగు మందులను కొనుగోలు చేస్తున్నారు. ఈ నేపథ్యంలో వారితో చనువుగా ఉంటూ వడ్డీ ఇస్తానంటూ నమ్మబలికాడు. అలా అయిదేళ్ల కాలంలో ఒక్కో రైతు నుంచి రూ.లక్ష నుంచి ఆరు లక్షల వరకు సుమారు 25 మంది వద్ద వడ్డీలకు తీసుకున్నాడు. కొంత మందికి ఏడాదికోసారి వడ్డీ చెల్లిస్తూ నమ్మించాడు. వానాకాలం సీజన్‌ ప్రారంభమవుతున్న తరుణంలో 20 రోజులుగా దుకాణం మూసేశాడు. అతడి కోసర ఆరా తీయగా ఫోన్‌ స్విచ్ఛాఫ్‌ వస్తుండటంతో రైతులు దుకాణం వద్దకు వచ్చిపోతూ ఆందోళన చెందుతున్నారు. సదరు వ్యాపారి ఆరునెలలుగా హసన్‌పర్తి మండలం ఎర్రగట్టుగట్ట సమీపంలో అద్దెకు ఉంటూ ఎల్కతుర్తిలో వ్యాపారం చేస్తున్నాడు. రెండు నెలల కిందట తన ప్లాట్‌ను విక్రయించగా రూ.20 లక్షలు వచ్చినా తమకు ఇవ్వలేదని బాధితులు వాపోయారు.