Telangana News: అత్యంత నిరుపేదలకు ప్రభుత్వ సంక్షేమం అందాలి: రేవంత్‌రెడ్డి

ఆత్మకూరు: వరంగల్‌ డిక్లరేషన్‌ ద్వారా రైతులను ఏ విధంగా ఆదుకుంటామో చెబుతున్నామని తెలంగాణ పీసీసీ అధ్యక్షుడు రేవంత్‌ రెడ్డి అన్నారు. రైతు సమస్యలపై చర్చించడంతోపాటు వాటికి పరిష్కారాలు చూపిస్తున్నామని తెలిపారు. వరంగల్‌ జిల్లాలోని ఆత్మకూరు మండలం అక్కంపేటలో కాంగ్రెస్‌ రచ్చబండ కార్యక్రమం నిర్వహించింది. ప్రొఫెసర్‌ జయశంకర్‌ స్వగ్రామంలో నిర్వహించిన ఈ కార్యక్రమంలో పాల్గొనేందుకు వచ్చిన తెలంగాణ పీసీసీ అధ్యక్షుడు రేవంత్‌రెడ్డికి స్థానిక నేతలు ఘనంగా స్వాగతం పలికారు. కార్యక్రమం ప్రారంభోత్సవానికి ముందు జయశంకర్‌ విగ్రహానికి రేవంత్‌ నివాళులర్పించారు. అనంతరం రేవంత్‌ మాట్లాడుతూ.. అత్యంత నిరుపేదలకు ప్రభుత్వ సంక్షేమం అందాలన్నారు. కేసీఆర్‌ చెప్పినట్లు ఎక్కడా మిషన్‌ భగీరథ నీళ్లు రావడం లేదని తెలిపారు. కొందరికి రెండు పడక గదుల ఇల్లు కాదు కదా.. పూరి గుడిసే కూడా రాలేదని ఆక్షేపించారు.